BAGUIO CITY-Nakasagana a makipatang ti HEDCOR Incorporated iti lokal a gobierno ti Bakun, Bengueyt tapno pagsaritaan ti pakasenan dagitoy seknan iti planta ti kompanya a naiparikep iti munisipyo.
Sigun iti kompanya, nakalanad iti napirmaan a katulagan ti panakaipaay ti business permit ken sabali met a tungtungan ti daduma a boluntaryo a suporta nga ipaay ti kompanya iti LGU.
Impettengda a dakkel ti naitulongda iti panagdur-as ti munisipyo ken dakkel ti epekto ti saan a panagandar ti planta dagitoy.
Dumanon met iti 35 ti empleyadoda a manipud sadiay Bakun, Benguet ti apektado iti panakaisara ti planta.
Immunan a kinuna ni Mayor Bill Raymundo a saanda a ninamnama ti panangpetisyon ti kompanyan kadakuada iti korte.
Nakasagana met ti mayor a mangsungbat iti pakaseknan ti HEDCOR ken pagsaritaan ti maipapan iti planta.
Gapu iti nasao a pakaseknan, matingiting iti korte no adda panaglabes ti LGU iti saanda a panangipaay iti permit iti HEDCOR gapu iti mapapati a kinakurang ti Memorandum of Agreement.
