BAGUIO CITY – Nakalukat ti maysa a 24-hour helpline ti Baguio City para iti mental health, nangruna dagiti agkasapulan unay.
Sigun kenni City Health Office Mental Health coordinator Ricky Ducas, ti mental health helpline number ket 0919-069-6361.
Kinunana a mabalin daytoy a kontaken dagiti indibidual nga agkasapulan ti tulong, pakairamanan dagiti agpaplano a mangdangran iti bagida para iti napartak a tulong wenno panakai-refer-da iti umno a professional wenno grupo.
Linawlawganna met a ti mental disorder ket mabalin a resulta ti biological factors, trauma, panaka-expose kadagiti napepeggad a substances ken dadduma a rason.
Innayonna a maididiaya ti libre psychiatric, neurologic consultation ken psychological assessment para kadagiti kwalipikado a nakurapay a kliyente sadiay City Health Office nga addaan ti libre nga agas wenno medisina.
Nakalukat met ti helpline number 0938-626-0724 seknan iti mental health.
