BAGUIO CITY – Nakemmeg ti maysa a High Value Target ti PDEA iti panangiserbi dagiti otoridad iti search warrant daytoy sadiay Zone 1, Barangay Linasin, Bangued, Abra.
Nabigbig daytoy a ni Elpidio Briones Acosta alyas Anggal, 56-anyos, naasawaan, administrative aide ti DPWH-Abra ken residente iti Zone 1, Linasin, Bangued, Abra.
Nakumpiskar iti pagtaenganna ti 14 a pakete ti maatap a shabu nga agdagsen iti 1.4970 grams ken nagduduma a drug paraphernalia.
Nagpositibo met iti shabu ti isbo ni Acosta a naipasidong iti eksaminasyon.
Naamuan a ti search warrant ket impaulog ni 1st Vice Executive Judge Rosanna Fe Romero-Maglaya ti Regional Trial Court – Branch 88, Quezon City.
Sumangsango ita ti nasao nga indibidual iti kaso a panaglabsing iti RA 9165 wenno ti Comprehensive Dangerous Drugs Act of 2002.
