Manarimaan a maipatpatungpal ita a bulan ti Nobiembre ti moratorium ti housing amortization para kadagiti miembro tapno mapalag-an ti pinansial a dadagsen dagitoy, sigun iti National Housing Authority (NHA).
Sigun kenni Cromwell Teves, National Housing Authority National Capital Region South Sector Office Corporate Planning Department manager, otomatiko a maipatungpal ti moratorium iti nasao a petsa, ken mangrugi manen ti panagbayad ti amortization ken lease payments inton Disiembre a uno.
Dinakamat ti nasao nga opisial nga awan ti kanayunan nga interest bayat ti petsa ti moratorium.
Immunan nga imbilin ti Department of Human Settlements and Urban Development (DHSUD) iti National Housing Authority ken dadduma pay a maseknan nga ahensia a temporario nga isardeng ti housing moratorium kadagiti amin a miembro a naapektaran bayat ti panagdalapos ti bagyo a Kristine.
Maibasar iti datos ti Disaster Risk Reduction and Management Council, dumanon iti 211,792 a babbalay ti naapektaran nga aggatad ti nasurok P3.4 milion bayat ti panagdalapos ti Kristine ken ti kaudian a bagyo a Leon.
