MANKAYAN, BENGUET – Rumrumwar iti imbestigasion a posible a human-induced ti rason iti nagsinnaruno a forest fire a napasamak iti munisipyo ti Mankayan, Benguet.
Iti exculusive interview ti Bombo Radyo kenni SFO2 Elmer Maton, chief of operation ken investigator ti BFP Mankayan, kinunana a posible a human-induced wenno aksidente ti napasamak nga uram.
Inyunay-unay daytoy a manarimaan paylaeng ti imbestigasion iti nasao nga insidente.
Maipalagip a napasamak ti immuna nga uram sadiay sitio Bayuyok, Barangay Tabio, Mankayan Benguet idi February 02, 2026.
Naireport kadagiti otoridad iti 5:18 pm ken narespondian iti 5:19 ti kapada nga aldaw.
Dagus a nagramaram ti apoy, sumagmamano nga oras ti napalabas gapu iti angin isu’t gapuna a naapektaran dagiti dadduma a bantay ken vegetation area.
Gapu iti dayta, dimmanon agingga iti 9:00 am ti February 03 ti panagsebseb dagiti kameng ti BFP.
Maibasar iti panagsukitmat dagiti otoridad, dumanon iti agarup lima nga ektarya ti napektaran iti nasao nga uram.
Impetteng met ni SFO2 Maton nga awan ti estraktura a nauram iti nasao nga insidente.
Iti sabali a bangir, napasamak metlaeng ti maysa a forest fire sadiay Manpey-as, Bulalacao, Mankayan Benguet idi February 04, 2026.
Nagramaram daytoy agingga iti kabanbatayan a paset ti Barangay Guinaoang.
Naideklara a fire out iti 7:00 am idi February 5, 2026.
Maibasar iti plotting ti Municipal Environment and Natural Resources Office (MENRO) – Buguias, mapatta-patta a 14 nga ektarya ti nauram.
Nupay kasta, awan ti naapektaran nga indibidual ken babbalay.
Kabayatanna, agtultuloy ti panangsapol ti BFP Mankayan iti testigo a posible a makatulong iti imbestigasyon dagitoy.
Sigun kenni SFO2 Maton, nagbalin a karit kadakuada ti rangkis nangruna iti panangsebsebda iti apoy.
Malaksid iti dayta, inaklon ti nasao nga opisial a kimmurang ti pwersa dagitoy iti baet ti tulong dagiti residente.
Nagbalin metlaeng a karit kadakuada ti kinakurang ti danum.
Agpalpalagip met daytoy kadagiti publiko nangruna kadagiti addaan iti garden a siguraduenda nga agaramid dagitoy iti firebreak iti kanito nga agkaingin dagitoy.
Kidkiddawenda metlaeng kadagiti residente a liklikan ti agpuor nu napigsa ti angin, agibelleng iti upos ti sigarilyo, nangruna kadagiti naruot a paset dagiti dalan.//Bombo Noveh Organo
