Nagpakdaar ni International Atomic Energy Agency (IAEA) chief Rafael Grossi a mabalin a mangpataud iti peggad ti “nuclear” apaman a mabombaan ti power grid ti Ukraine babaen ti panangsinga ti suplay.
Daytoy ket kalpasan a nagbisita ni Grossi idiay Kyiv ken sinukimatna ti maysa nga electricity distribution substation.
Impablaak ni Grossi dagiti ladawan ti panagbisitana iti substation a kaduana ni Energy Minister German Galushchenko, ken naipakita kenkuana ti sitwasion ti panagdipensa kontra iti panagatake ti Russia.
Maipalagip nga iti tallo a tawen, kanayun a bombaan ti Moscow ti energy infrastructure ti Ukraine pakairamanan ti substations a naipasdek sadiay, ngem naliklikan ti direkta a panagatake kadagiti nuclear plants ti Ukraine.
Panggep ni Grossi a sumarungkar idiay Russia inton maudi a paset iti agdama a lawas tapno pagsaritaanda ti kasasaad ti Ukraine ken ti sakupen ti Russia a Zaporizhzhia nuclear power plant.
