BAGUIO CITY – Nakalasat ti Igorot a police director ti Cagayan Police Provincial Office kalpasan a sinaneb dagiti New People’s Army (NPA) ti convoy daytoy idi kalman sadiay Barangay San Carlos iti munisipyo ti Gattaran.
Maibasar iti inisyal a report, pinatuduan iti bala dagiti NPA ti convoy ni PSSupt. Warren Gaspar Tolito ngem dagus a naka-atras ken nakaadayo dagitoy manipud iti ambush site.
Paturong ti convoy ni Col. Tolito ken dagiti sumagmamano a police iti balay ni Army veteran Dexter Remodaro tapnu sukimatenda daytoy kalpasan a rinaut dagiti rebelde idi rabii ti Dominggo idi napasamak ti panagsaneb.
Maipalagip a nadangran ti agina a kabagian ti nasao a retirado a soldado.
Ni PSSupt. Tolito ket tubo iti probinsia ti Benguet ken maysa a lisensiado nga engineer sakbay a simrek iti kinapulis.
