BAGUIO CITY – Nainget ti panagsagana ni national muay thai team member Islay Erika Bomogao para iti panakipasetna iti 2022 Southeast Asian (SEA) Games sadiay Hanoi, Vietnam inton Mayo.
Sigun kenkuana, agtultuloy ti panagsanayna tapnu makaiyawid ti medalya para iti pagilian nupay inaklonna a karit kenkuana ti panangibalansena iti panagadal na ken ti panagsanayna.
Maipalagip a ni Bomogao ti silver medalist iti women’s 45-kilogram category ti muay thai iti 2019 SEA Games a naangay ditoy pagilian.
Naamuan a manipud iti muay thai combat event ket agsukat ti 20-anyos nga Igorot muay thai artist iti ay-ayam iti 2022 SEA Games.
Naituding nga ibagina ti Pilipinas iti wai kru event kalpasan a saan nga inraman ti Vietnam ti combat event kadagiti ay-ayam para iti muay thai.
Daytoy ti maikadua a panagay-ayam ni Bomogao iti wai kru kalpasan ti panangabakna ti gold medal iti wai kru – individual, senior female category iti 2021 IFMA World Championships a naangay sadiay Thailand.
Kabayatanna, karaman ni Bomogao kadagiti 25 a personalidad a nabigbig ken napadayawan iti kaunaan nga sports award ti Media Sports Development Baguio a maysa nga sports group iti Baguio City.
