Nagkiddaw ni Senate Majority Leader Francis Tolentino iti panagimbestigar maipapan iti underwater drone a nasarakan iti baybay idiay probinsia ti Masbate tapno maammuan ti epektona iti seguridad ti pagilian.
Ti kiddaw ni Senador Tolentino ket babaen ti Senate Resolution 1267 nga impilana idi kalman.
Nadakamat iti resolusion a rumbeng a naotorisaan ti gobierno dagiti kagawaan a kas ti submersible drone a maar-aramat ti marine scientific research.
Nadutukan ti Senate Special Committee on Philippine Maritime and Admiralty Zones a maimbestigaran ti nagtaudan ti drone, maammuan ti “operational capabilities,” ken panagtungpal kadagiti linteg ti Pilipinas iti maritime.
Maipalagip a nasarakan dagiti tallo a mangngalap ti “underwater drone” iti baybay a paset ti Barangau Iniwaran, San Pascual, Masbate idi Disiembre a trente idi napalabas a tawen.
Maibasar iti inisial nga assessments dagiti otoridad, ti drone ket mapapati a nagtaud idiay China, ken naaramid manipod iti PVC ken landok nga agtigtignay kas remote-controlled electronic device a mabalin a mausar para iti komunikasion ken “navigation.”
Iti agdama, manarimaan ti imbestigasion dagiti otoridad ti agtagikua ti nasao nga alikamen ken panggep ti pannakaideploy ti drone iti baybay.
