Manarimaan ti imbestigasyon ti City Health Services Office iti rason ti maatap nga insidente iti food poisoning kadagiti lokal a turista a nangan iti maysa a samgyupsalan iti siudad.
Iti panakiuman ti Bombo Radyo kenni Dra. Celia Flor Brillantes, City Health Officer iti siudad ti Baguio, kinunana nga agpada nga ad-adalen ti City Health Services Office (CHSO) dagiti taraon a kinnan dagiti biktima kasta metten ti danum nga iti nasao a samgyupsalan nu daytoy kadi ket kontaminado.
Sigun kenni Brillantes, rabii ti January 4 idi nangan dagiti biktima iti samgyupsalan ngem kalpasan ti maysa nga oras ket nakapasar dagitoy iti panagsarwa ken diarrhea.
Iti met panakiuman ti Bombo Radyo kadagiti biktima, walo amin dagitoy a nakapasar iti diarrhea ngem maysa kadagitoy ti saan a nakipangan iti samgyupsalan.
Maysa kadagitoy ti na-admit iti ospital iti las-ud ti uppat nga aldaw bayat nga innem kadagitoy ti treated as outpatient.
Gapu iti nasao nga insidente, nagballaag ni Dra. Brillantes kadagiti amin a restaurant, canteen ken water station a nasken a kitaen dagitoy a nasayaat dagiti idasdasarda a taraon kasta met a kitaenda a purified dagiti danum nga ipaayda kadagiti kustomer wenno saan ket ti panangipaburokda iti danum.
Kinuna pay ni Dra. Brillantes a sipud idi napalabas a bulan ket magipatpatungpal dagitoy iti inspection kadagiti canteen, restaurant ken nagduduma nga establishimento tapno masigurado a nasayaat ti preparasyon ken storage dagiti taraon.
Para met kadagiti water station, maipaspasidong dagitoy iti laboratory test.
Innayon ti nasao a doktora a kadagiti panawen a mapaspasamak ti food poisoning, temporaryo pay laeng a maiparekkep ti establishemento a nakapasamakan daytoy para iti inspection ken panakaadal.//Bombo Mera Pacpacan
