Impeksa ni Senador JV Ejercito a rumbeng a maituloy ti impeachment trial ni Vice President Sara Duterte ken aramiden ti Senado kas impeachment court.
Malaksid a pagrebbengan ti Senado a nakalanad iti Konstitusion a mangisayangkat iti impeachment proceedings, gundaway pay ti Vice President a dalusan ti naganna manipod kadagiti alegasion a maibatbato kontra kenkuana.
Para pay kenni Senador Ejercito, dagiti senador nga agtugaw iti 20th Congress inton July ti rumbeng nga agdesision maipapan iti impeachment trial.
Itay laeng nabiit, inyebkas metlaeng ni Senador Alan Peter Cayetano a pagrebbengan ti Senado a denggen ti kaso ti impeachment ni Duterte iti laksid ti addang dagiti sumagmamano a senador a saan a maangay ti “trial” gapu kadagiti ligal nga isyu.
