CORDILLERA –Inlawlawag ni Police Regional Office Cordillera Administrative Region (PRO CAR) Regional Dir. PBGen. Ericson Dilag nga awan ti naawat dagitoy a direktiba manipud kenni Department of Interior and Local Government (DILG) Secretary Juanito Victor ‘Jonvic’ Remulla seknan iti maatap a panagtalinaed ni sigud a Bureau of Corrections (BucCor) Chief Gen. Gerald Bantag iti kabambantayan a paset ti rehion Cordillera.
Sigun kenni Dilag, dagusda a nakikoordinar kadagiti assets dagitoy a posible nga adda ti pakainaiganda wenno addaan iti impormasyon seknan iti paglemlemmengan ni Bantag.
Nupay kasta, negatibo ti sungbat dagiti informants dagitoy.
Impanamnama ni Dilag nga agtultuloy ti operasyon dagitoy tapno masigurado nga awan ni Bantag iti masakupan daytoy a lugar.
Impetteng ti nasao nga opisiyal a posible a nagtaud ti impormasyon nga adda ni Bantag iti rehion babaen kadagiti dadduma nga informants gaputa, awan ti naawat dagitoy nga impormasyon seknan iti daytoy.
Impasigurado ni Dilag nga addaan dagitoy iti umdas a bilang dagiti informants manipud kadagiti tribu nga agnanaed kadagiti kabambantayan ti Cordillera.
Iti baet dayta, awan paylaeng ti impormasion manipud kadagiti nasao nga informants.
Sigun pay kenni Dilag, dagus a mapakaamuan dagiti otoridad iti kanito nga adda ti impormasyon manipud kadagiti assets tapno maisayangkat ti search operations ken maiserbi ti warrant of arrest kontra iti sigud a BuCor Chief.
