Nabigbigen ti cybercrime investigators dagiti indibidwal a responsable iti panagwaras ti peke a medical record ni President Ferdinand Marcos Jr.
Nupay kasta, nagkedked dagitoy nga ipakaammo ti pakabigbigan dagiti nasao nga indibidwal.
Sigun kenni Anti-Cybercrime Group (ACG) director Brig. Gen. Wilson Asueta, saan pay a rumbeng a maiwaragawag ti nagnagan dagiti adda iti likudan ti panakaipablaak ti peke a dokumento gapu ta saan pay a nalpas dagiti maseknan nga ahnesya ti imbestigasyon dagitoy.
Immunan nga inladawan ni Philippine National Police (PNP) chief Gen. Jose Melencio Nartatez Jr. a ti nasao a banag ket mangipakpakita iti saan a panagraem, kina-insensitibo, ken nalawag a panaglabsing iti paglintegan partikular iti karbengan ti presidente iti privacy daytoy.
Maipalagip a kasaruno ti panakaipakaammo a naiturong ni President Marcos Jr. iti pagagasan ken nadiagnose daytoy iti Diverticulitis ket adda ti nagwaras a dokumento a naglaon iti maatap a medical examination ti presidente.
Nupay kasta, kinondenar daytoy ti Palasyo Malacañang ken nangiruar metlaeng ti maseknan nga opisina iti advisory a ti nasao a dokumento ket saan a nagtaud iti opisyal a rekord dagitoy.
