BAGUIO CITY – Bimmaba ti presyo dagiti sumagmamano a nateng ditoy lokalidad kabayatan ti holidays.
Iti interview ti Bombo Radyo Baguio kenni Agot Balanay, General manager ti Benguet Farmers Cooperative, inaklonna a bimmaba ti presyo ti carrots ken dagiti oversized a repolyo idi Disiembre 22 ken 23 idi napan a tawen.
Imbinglayna nga ado ti saan unay a nagatang a carrots kadagiti nadakamat nga aldaw kalpasan nga kinontrol dagiti buyers ti panaggatang kadagitoy.
Imbinsina a maysa a rason ditoy ti panagwaras dagiti smuggled a nateng a naigiddan a naiwaras ken nailako kadagiti nagduduma nga merkado iti pagilian.
Inaklonna met a maysa a rason ti adu ti suplay ti nateng a naapit dagiti mannalon iti rehiyon nangruna ta awan unay ti napasaran ken epekto dagiti bagyo iti produksion dagiti nateng kabayatan ti maudi nga quarter ti 2021.
Malidayan daytoy gaputta apektado dagiti mannalon iti presensia dagiti maipuspuslit a nateng iti laksid dagiti nairtengan a pagalagadan ti gobierno seknan ti iseserrek dagiti produkto.
Impeksana manen ti panagtubngarna iti agtultuloy a panagwaras dagiti maipuspuslit a nateng wenno prutas iti pagilian iti baet ti agtultuloy a panagdengeg ti Senado kadagiti smuggled a produkto.
Mangnamnama daytoy a tutukan ti nasyonal a gobierno ti agdama a parikot ken pakaseknan dagiti mannalon iti pagilian.
