BAGUIO CITY – Naiparangen ti inisyal a comprehensive master development plan para iti Baguio City Public Market a binukel ti technical working group (TWG).
Gapu iti daytoy, manarimaan metten ti panangadal ti lokal a gobyerno, ti TWG ken ti City Buildings and Architecture Office iti nasao a plano sakbay ti panaki-partner-da iti maysa a kooperatiba para iti panakatungpal ti joint venture project.
Immunan a kinuna ni Mayor Benjamin Magalong a nawaswasen ti kontrata ti lokal a gobyerno ken ti Uniwide Sales and Resources Corporation kalpasan a napaay ti korporasyon a mangtungpal iti kontratada para iti panakapasayaat ti merkado publiko.
Indeklara pay ti Securities and Exchange Commission a saan a kabaelan ti nasao a korporasyon a mangpondo iti panakapasayaat ti merkado publiko.
Kinuna ni Mayor Magalong a pinaka-ammuan ti lokal a gobyerno ti Baguio ti nasao a korporasyon idi napalabas a tawen seknan iti panakawaswas ti kontratada.
Tarigagay ti comprehensive master development plan a mapasayaat ti agdama nga estado ti city public market.
Sigun kadagiti mammanday linteg ti siudad, nasken nga iti kabiitan a panawen ket mapasayaat ti merkado publiko ti Baguio tapnu maipada daytoy iti dadduma a napasayaat a market structures kadagiti first class municipalities iti dadduma a paset ti Northern Luzon.
Naituding a maiparang kenni Mayor Magalong ken iti publiko ti nasao a plano iti kanito a makompleto daytoy. (with Bombo Charles Nikko Limon)
