BAGUIO CITY – Nangrugi idi kalman ti inaldaw a pannakaipasidong iti testing ken sealing kadagiti weighing scales wenno pag-kiluan iti Baguio City Public Market.
Maipatungpal ti inaldaw a testing ken sealing iti Office of the Market Superintendent manipud alas 8:30 ti agsapa aginggat alas 4:00 ti malem.
Sigun kenni Market Supt. Fernando Ragma Jr., sungbat daytoy iti reklamo ti dadduma vendors maipapan kadagiti nagpaso nga stickers dagiti pagkiluan dagitoy.
Kinunana nga aksion met laeng daytoy iti reklamo ti dadduma a market goers maipapan iti awan silyo-na ken dadael a pagkiluan iti merkado.
Mainaig iti daytoy ket al-allukuyen ni Ragma dagiti negosiante kadagiti babbarangay nga ipasidongda iti testing, sealing ken calibration dagiti pagkiluan dagitoy tapno saanda a mamulta.
Guyguyuguyenna pay ti publiko a mangaramat iti Timbangan ng Bayan iti merkado tapno maireport no adda ti parikot iti timbang dagiti ginatangda a produkto.
