BAGUIO CITY – Agpapaimbagen ti innem nga agkakabagian kalpasan a naaksidente ti nagluganan dagitoy a van iti paset ti national highway sadiay Barangay Calungbuyan, Balaoan, La Union idi rabii kalman.
Nabigbig ti driver ti van a ni Marchian Sagang, 30-anyos bayat a nabigbig dagiti pasahero daytoy a da Wilfredo Camma, 40; June Collera, 30; Jemory Cumot, 64; Delio Sison, 26 ken Ariel Cumot, 28 a bin-ig a residente ti Kayapa, Bakun, Benguet.
Maibasar iti imbestigasyon ti pulisya, paturong ti van iti amianan a direksion idi maatap a nag-overtake daytoy iti sarsarunuenna a lugan.
Nupay kasta, napukaw ti driver ti kontrolna iti manibela ti lugan isut gapuna a nagdiretso iti bangir a linya ti kalsada agingga a naidungpar iti maysa a kayo gapu iti kakadlis ti kalsada.
Gapu iti kapigsa ti panakaidungpar ti van iti kayo ket natumba daytoy ken nadadael ti sangwanan a paset ti lugan.
Dagus a nagresponde dagiti pulis ken intarayda iti ospital dagiti biktima.
