Manamnama a makaruar ita nga aldaw ti atleta manipod Baguio City a na-dengue iti agtultuloy a Palarong Pambansa idiay Cebu, City.
Iti panakaiuman ti Bombo Radyo kenni Edgar Madlaing, Regional Sports Coordinator ti Department of Education-Cordillera, innem nga atleta iti delegasyon ti Cordillera ti nagsagrap iti nasao a sakit nu sadino kaadwan kadagitoy ket manarimaan ti panagrekoberda.
Atapen ni Madlaing a naala dagiti ubbing ti virus iti siudad ti Baguio ken iti Benguet gapu ta maysa kadagitoy ket kinasapulanda nga iturong iti pagagasan apaman a nakasangpetda idiay Cebu.
![](https://img.bomboradyo.com/baguio/2024/07/MDALAING.jpg)
ti suspetsak ket naala dita ayan tayo ta kaadwan na ket baguio ken benguet dagitoy. jay maysa nga taga itogon ket pagsangpet paylaeng ket impan tayo ijay ospitalen.
Edgar Madlaing- Regional Sports Coordinator-Department of Education-Cordillera
Nupay kasta, naipakammon kadagiti nagannakda ti maipapan iti kasasaadda ken kinuna ni Madlaing a nagsisinnublat dagiti coaches a nagbantay kadagitoy iti pag-agasan.
Mainaig iti dayta, imbinglay ti opisyal nga awan ti nagbalin a parikut iti panagtalinaedda idiay Cebu gapu ta impapati dagiti host ti nasayaat a panangakomodarda iti delegasyon ti Cordillera.
Adda laeng ti pakaseknan dagitoy iti distansya ti pagdagusanda ken dagiti playing venues rason a nangipatungpalda kadwana dagiti coaches ken team managers ti plano seknan iti schedule ti transportasyon dagitoy.//Bombo Rob Dominguez