BONTOC, MT. PROVINCE – Dumanon iti dua pulo ti insidente ti uram ti nairekord ti Bureau of Fire Protection – Bontoc manipod Enero agingga iti agdama a bulan iti agdama a tawen.
Iti interview ti Bombo Radyo kenni Senior Fire Officer 1 Clifford Chinalpan, Deputy ti Bureau of Fire Protection – Bontoc, nangatngato daytoy nu idilig iti uppat nga insidente a nairekord idi napalabas a tawen iti agpada metlaeng a bulan.
Kinuna ni Chinalpan a kaingin ti kangrunaan a rason ti mapaspasamak nga uram idiay Bontoc, Mountain Province.
Daytoy ket gapu ta panawen ti panagdalus isu’t gapuna nga adu dagiti umili sadiay ti agturturong kadagiti kabambantayan.
Malaksid iti kaingin, patien ni Chinalpan nga epekto ti El Nino ti mapasmasapamak nga uram kadagiti nagduduma a lugar iti rehiyon Cordillera.
Inaklonna pay a karit kadakuada ti nangato a bantay ken rangkis iti panagsebseb iti uram.
Nupay kasta, impasiguradona nga ar-aramidenda ti nagduduma a wagas kas iti “swatting” wenno babaen ti truck sprayer tapno dagos a masebseban ti uram.
Imbinglayna a ti kabayagan nga uram a sinebsebanda ket dumanon iti dua nga aldaw ken dua a rabii a napasamak iti maysa a bantay bayat a ti kalawaan ket nagbayag iti lima nga aldaw a napasamak met idiay Mt. Pukis, Bontoc Ili, Bontoc, Mountain Province.
Maibasar pay iti occular inspection dagitoy, 40 hectares ti kalawaan a nauram iti maysa a bantay iti nasao a probinsia bayat nga awan ti nairekordda a nadangran.
Gapu kadagiti nagsasaruno nga uram, nagballaag ti nasao nga opisial a liklikan ti kaingin nangruna iti panagpuor ti ruot ken nagduduma nga aktibidid a mabalin a mangitunda ti uram.
Kabayatanna, pinagyamanan ti nasao nga opisial dagiti amin a tumultulong nu adda ti mapaspasamak nga uram pakairamanan ti Barangay Officials, Department of Natural Resources (DENR), Philippine National Police, National Disaster Risk Reduction Management Council (NDRRMC), Local Government Unit (LGU), Criminology Intern ken dagiti volunteers.//Benjo Guzman
