BAGUIO CITY -Agtultuloy ti panangsukimat dagiti transportation inspectors ti Land Transportation Franchising and Regulatory Board (LTFRB) ken Land Transportation Office (LTO) kadagiti parapasahero a lugan iti lokalidad.
Iti interview ti Bombo Radyo Baguio, kinuna ni LTO-Cordillera regional director Francis Ray Almora a babaen iti nasao nga addang ket makita ti panagtungpal dagiti drivers ken dagiti pasahero kadagiti amin a paglintegan tapnu makaliklik iti COVID-19.
Kinunana a maisaysayangkat ti inspeksion kadagiti igid dagiti kalsada ken kadagiti paradaan dagiti lugan.
Dinakamatna a kabayatan ti inspeksion ket nainget a mapalpalagipan dagiti pasahero iti umno a panagsuot dagitoy iti face mask ken face shield, pakairamanan ti kaadda dagiti foot disinfection ken thermal scanning sakbay a sumrek ti pasahero iti lugan.
Sigun kenkuana, nainget ti panangilawlawag ken panangipaka-awatda kadagiti drivers dagiti parapasahero a lugan no apay a nasken a masurot dagiti health protocols ken kadagiti pasahero no apay a nasken nga agtungpalda kadagiti pagalagadan.
Innayonna pay a naisayangkat dagiti inspeksion kalpasan a nakaawatda iti report mainaig iti kinarugit dagiti naimuntar a plastic barriers iti sumagmamano a lugan.
