Inkalintegan ti International Criminal Court (ICC) ti panagbalinna nga independent kasaruno ti panangawag ni VP Sara a paspasurot ti nasao a korte kada President Ferdinand Jr. kenni sigud a senador Antonio Trillanes IV.
Maipalagip a kabayatan ti bitla ni VP Sara iti rally iti sangwanan ti ICC kaduana dagiti supporters daytoy idiay The Hague, inawaggana ti ICC a ‘lapdog’ wenno paspasurot kenni President Ferdinand Marcos, Jr, ken sigud a senator Trillanes.
Inakusaranna nga ada ti mapaspasamak a ‘sabwatan’ iti nagbaetan ti ICC ken dagiti dua tapno maarestar ti ama daytoy a ni sigud a President Rodrigo Duterte seknan iti “war on drugs’ a programa daytoy.
Nupay kasta, impetteng ni ICC spokesperson Oriane Maillet a ti nasao a tribunal ket maysa nga international judicial institution a mangipatpatungpal iti mandato daytoy nga agbalin a patas kas maitunos iti Rome Statute.
Inlawlawag metlaeng ti nasao a korte a saanda a mangipaay iti partikular a reaksyon wenno personal a komento seknan iti mismo nga insawang ti bise presidente.
Immuna metten a pinaglibakan ti Malacañang ti akusasyon ti bise presidente no sadino inawaganda daytoy nga awan basaran ken ‘useless’.
Impetteng metlaeng ni sigud a senador Trillanes a saan a paspasurot ti nasao a korte iti asinoman. //bombokaren.c.sapirao