BAGUIO CITY – Naduktalan ti iregularidad iti implementasyon ti proyekto ti Commission on Audit (COA) – Cordillera a panakaibangon ti training center daytoy a naponduan ti P59.097-M.
Nailanad daytoy iti 2020 annual audit report dagiti government auditors a nairuar iti publiko idi kalman.
Nailanad iti report ti audit team a posible a napukaw ti gobyerno ti P3.38-M gapu iti unrecouped fees a naibayad iti kontraktor ti regional training center and dormitory building ti ahensia iti rehion Cordillera.
Naamuan a winaswas ti kontraktor ti kontratada iti COA idi September 2020 gaputa saan daytoy a kabaelan nga ituloy ti proyekto a nakompleto kuma idi pay May 2020.
Nupay kasta, saan pay a narekober wenno nasubli ti COA-Cordillera ti P3.38-M a mobilization and retention fees nga imbayadda iti kontraktor.
Gapu iti daytoy, imbalakad ti audit team ti panangsubli ti COA-Cordillera iti nasao a gatad babaen iti panangipaulogda ti demand letter iti kontraktor wenno saan ket ti panakinegosasyonda iti daytoy wenno saan ket ti panangipilada ti reklamo iti korte.
Naipaayan ti COA-Cordillera iti 60 nga aldaw a pawayway tapnu isumitir ti status report kadagiti aksion nga inaramidda mainaig iti nasao a pakaseknan.
