BAGUIO CITY – Mangisayangkat iti nainget a random checkpoint ti municipio ti Bakun, Benguet kas panagsagana ti panangrambak iti Paskua.
Sigun ken Mayor Bill Raymundo, nakikoordinar dagitoyen iti Bakun Municipal Police Station seknan iti nainget a panagbantayda iti border checkpoint dagitoy gaputa manamnama nga adu dagiti agawid a residente ita a Yuletide season.
Inlawlawagna nga irekrekomendar latta ti municipio ti panagala dagiti umili nga agawid iti health declaration form no agtaudda iti dadduma a municipio ti Benguet.
Kabayatanna, kinunana a kasapulan met nga agala iti travel authority, medical clearance ken health declaration form dagiti indibidual nga agawid sadiay Bakun nga agtaud iti daduma a probinsia wenno rehion.
Sigun ken ni Raymundo, saanda nga iparit ti panagawid dagiti umili dagitoy ita nga Paskua ngem masapul ti panagtungpal kadagiti minimum health standards tapno maliklikan ti panagwaras iti COVID-19.
