NEWS ANALYSIS- Ti panaglangan ni Senador Ronald “Bato” dela Rosa iti panaglukat ti bicameral conference committee hearing para iti pannakatalantan ti nasurok ₱6.7 trillion a national budget inton sumaruno a tawen ket saang laeng a simple nga isyu iti attendance wenno presensiya.
Daytoy ket nalawag nga adda pakainaiganna iti responsibility, transparency ken respeto iti proseso ti Senado.
Nupay kinuna ni Senate Finance Chair Sherwin Gatchalian a saan a naapektaran ti taray ti bicameral conference iti panaglangan ni Dela Rosa, nabatad latta ti kinaawan iti abiso wenno pammalawag manipud iti senador wenno iti staff daytoy nangruna ta isuna ti vice chair ti finance committee ken opisyal a miembro ti Senado iti panagdengngeg.
Ti agtultuloy a panangliklik ni Dela Rosa iti publiko kalpasan a rimwar ti damag seknan iti mapapati nga arrest order kontra kenkuana manipud iti International Criminal Court ket nakapataud iti saludsod. Iti baet ti personal a parikut wenno pangta, agingga kaano a rumbeng nga iprioridad ti maysa a mammanday-linteg ti obligasyon ken responsibilidadna kadagiti Pilipino a nangibotos kenkuana?
Ti panagulemek ni Senador Dela Rosa ken ti kinaawan iti pammalawag manipud kenkuana ket mabalin a mangitunda iti panagbuteng ti publiko maipapan iti kredibilidad ken integridad ti Senado uray pay agtultuloy ti proseso ti bicameral.
Ti aktibo a partisipasyon ken komunikasyon ti maysa nga opisyal ti gobyerno ket saan laeng a paset ti obligasyonna, nu di ket daytoy pundasyon tapno ad-adda nga agtalek dagiti umili kenkuana.
Ti responsibilidad ket saan a rumbeng a sumardeng gapu iti personal a pangta wenno kontrobersiya nu di ket gundaway daytoy tapno ipakita iti publiko a ti responsibilidad ket nasursurok pay ngem iti personal nga interes.//Bombo Cara
