BAGUIO CITY – Inyusuaten ti Department of Health (DOH) – Cordillera ti Iwas Paputok a kampanya tapno maliklikan ti panagaramat iti palibang ita a holiday season.
Sigun kenni DOH-Cordillera Medical Officer IV Jennifer Joyce Pira, puntiria ti kampania a maliklikan nga adda ti madangran gapu pay laeng iti paputok.
Al-allukuyenna dagiti umili nga agaramat kadagiti alternatibo a bambanag a mangpataud iti ariwawa iti pannakarambak ti Paskua ken Baro a Tawen.
Kinunana a paset pay ti kampania ti panangipauneg iti nasalun-at a taraon tapno maliklikan dagiti sakit.
Inallukoy pay ni Pira ti publiko a mangliklik kadagiti party ken reunion dagiti pamilia ken clan kas paset ti pananglilik iti COVID-19.
Malaksid iti Iwas Paputok ket inyuswat pay ti DOH-Cordillera ti Tuloy and Paskong Pinoy, Healthy Handaan, Ligtas na Regalo ken BIDA ang Pagdiriwang.
Amin dagitoy a programa ket para iti naragsak ken natalged a panakarambak ti holiday season uray mapaspasaran ti pandemya.
