BAGUIO CITY – Inaklon ni Land Transportation Franchising and Regulatory Board (LTFRB-CAR) Regional Director a ni Engr. Lalaine Sobremonte a saan pay a naipaayan iti sueldo dagiti job orders dagitoy manipud pay idi Hunyo.
Sigun kenkuana, dumanon iti uppat ti job order ti LTFRB-Cordillera ngem nagikkaten ti maysa kadagitoy gapu iti nasao a parikot.
Kinunana a nakikoordinardan iti Land Transportation Office – Cordillera (LTO-CAR) Finance Officer mainaig iti nasao a banag ngem kinunada a nangipasada metten iti requirements iti Department of Budget and Management (DBM) para iti pondo a maaramat para iti sweldo dagiti job orders.
Kinunana nga uray saan pay a naipaay ti sweldo ti tallo a job orders da ket sumsumrekda latta iti trabaho.
Innayonna nga adu met laeng ti maaw-awat ti opisinada a reklamo seknan iti saan a panagsweldo dagiti job orders.
Inaklon pay ni Engr. Sobremonte a kurang ti pwersa dagitoy isut gapuna a kasapulanda latta ti job orders.
Immunan nga nakaawat iti reklamo ti Bombo Radyo mainaig iti saan a panagsueldo dagiti job orders ti LTFRB-Cordillera.
