BAGUIO CITY – Imbutaktak ti manager ti maysa a kooperatiba dagiti mannalon iti Benguet, Mountain Province, Ifugao, Baguio City ken Nueva Vizcaya nga addan dagiti imported a repolyo a nagtaud sadiay China a maatap a mailaklako ita sadiay sadiay Metro Manila ken Cagayan de Oro.
Iti panakiuman ti Bombo Radyo Baguio kenni Agot Balanoy, General Manager ti Hi-Land Farmers’ Multi-Purpose Cooperative, kinunana a naireport kenkuana nga adda dagiti saan a nagatang a repolyo a nagtaud ditoy lokalidad gapu kadagiti imported a repolyo a mailaklako ita iti Divisoria Market sadiay Manila iti nababbaba a presyo.
Kinunana nga smuggled wenno iligal a naiserrek ditoy pagilian dagiti nasao nga imported a repolyo a mailaklako ita sadiay Divisoria iti presyo a P70 tunggal kilo.
Sigun kenkuana, adayo a nababa ti nasao a gatad no idilig iti P125 tunggal kilo a presyo dagiti repolyo nga agtataud iti lokalidad.
Dinakamatna metlaeng nga adda dagiti repolyo a naisalog sadiay Manila a saan pay a nalako agingga ita.
Naobserbaranda metlaeng nga adda dagiti sumagmamano a buyers manipud Manila a simmardengen a gumatang kadagiti repolyo manipud iti lokalidad ken adda met dagiti dadduma a buyers a nagkissay ti kaado dagiti repolyo a gatgatangen dagitoy.
Imbinglayna a manipud iti 2-3 a tonelada ket nagbalinen a 500-700 a kilo laengen ti gatgatangen dagiti sukida a buyers manipud Manila.
Innayon pay ni Balanoy a saan laeng nga imported a repolyo ti nakitada a mailaklako sadiay Manila ngem adda payen dagiti carrots, celery ken onion leeks.
Gapu iti daytoy, kinunana a dakkel ti agbalin nga epekto ti kaadda dagiti imported a nateng iti industriya ti nateng iti lokalidad gaputa saanen a maggatang dagiti sumagmamano a nateng a maiturturong sadiay Manila.
Malaksid iti daytoy, imbutaktak pay ni Balanoy nga adda dagiti sayunguseng nga adda metten ti mailaklako kadagiti nasao nga imported/smuggled cabbage iti Hangar Market iti siudad ti Baguio.
Mangnamnamada met a daus daytoy nga aksionan dagiti maseknan nga ahensia kalpasan a nangipatulodda ti surat mainaig iti nasao nga isyu.
Immunan nga impablaak ti kooperatiba iti FB page dagitoy ti panagballaagda kadagiti konsyumer seknan iti maatap nga imported/smuggled cabbage manipud China a sigun kadagiti sources ti kooperatiba ket mailaklakon sadiay Metro Manila ken Cagayan de Oro iti presyo a P70 tunggal kilo ken ti maatap a panakaiturong ti nasao a nateng ditoy siudad ti Baguio.
