BAGUIO CITY – Patien ni Contact Tracing Czar ken Baguio Mayor Benjamin Magalong a nakastreken wenno addan ditoy siudad ti UK variant ti COVID-19.
Kasaruno daytoy ti report ti Department of Health a panagpositibo iti UK variant ti COVID-19 ti 12 a residente ti Bontoc, Mountain Province ken maysa a kapada a kaso iti La Trinidad, Benguet.
Sigun kenkuana, uray pay dagiti umili ti Bontoc ket agturturongda iti siudad ti Baguio bayat nga iti panagwanawanda iti nagbeddengan ti Baguio ken La Trinidad ket dumandanon iti 800 a lugan ti innaldaw a dumaldalyasat iti nagbeddengan dagitoy.
Maipalagip nga agkaabay laeng ti La Trinidad ken Baguio ken iti La Trinidad a lumablabas dagiti agaw-awid sadiay Bontoc, Mountain Province.
Gapu iti daytoy, iyap-apela manen ni Mayor Magalong ti nainget a panagtungpal dagiti umili ti siudad kadagiti maim-implementar a health protocols nangruna ti umno a panagsuot ti face masks ken face shields.
Naibilin metten ti nainget a panangimplementar ti Baguio City Police Office ken Public Order and Safety Division iti safety protocols kontra iti COVID-19 ken ti panakadusa dagiti aglabsing kadagitoy.
Mamulta iti P500-P3,000 dagiti saan nga agsuot ti face mask bayat a mapaawid dagiti awanan ti face shield.
Kabayatanna, inwaragawag pay ni Mayor Magalong a naan-anayen a nakanselar ti selebrasyon ti Baguio Flower Festival wenno Panagbenga ita a tawen gapu iti pangta ti baro a COVID-19 variant.
