BAGUIO CITY – Naawaten ni Kalinga Governor Engr. Ferdinand Tubban ken ti asawana a ni Dra. Ana Tubban ti umuna a dose ti bakuna kontra iti COVID-19 babaen iti Sinovac vaccine sadiay Kalinga Provincial Hospital idi agsapa.
Sigun kenkuana, ti panagpabakunana kontra iti COVID-19 ket saan laeng a para iti mismo a bagi ngem ketdi, maysa a social responsibility daytoy.
Dinakamatna a responsibilidadna ti salun-at-na ken saanna a kayat nga apektaran ti COVID-19 ti kondisyonna ken malapdan ti panagserbisyona iti publiko.
Kagiddan iti daytoy ket ginuyugoyna met dagiti umili iti probinsia iti pananggundawayda iti adda a bakuna kontra iti COVID-19 ken iti panagtalekda a masalwadan ti salun-atda babaen iti vaccination program ti gobyerno.
Innayonna a ti panagpabakuna kontra iti COVID-19 ket maysa nga opurtunidad tapnu bantayan ti bagi ken dagiti pamilya wenno ay-ayaten iti biag.
Maibasar met iti report ti Kalinga Provincial Health Office, dumanon iti 723 a frontline health workers ti nabakunaan kontra iti COVID-19 sadiay Kalinga manipud Marso 7 agingga idi Abril 19 ti agdama a tawen.
