BAGUIO CITY – Nalimitaran ti panangawat ti Kalinga Provincial Hospital kadagiti pasiente ti COVID-19 nangrugi idi kalman.
Daytoy ket kalpasan a kaadoan kadagiti healthcare workers ti ospital ti nagpositibo iti nasao a sakit.
Inlawlawag ni Marilyn Duyan, dadaulo ti nasao nga ospital a malimitaran ti admission metlaeng kadagiti non-COVID nga department ti ospital.
Malaksid iti dayta, temporaryo a saanda pay nga umawat kadagiti pasiente manipod iti ruar ti probinsia pakairaman dagiti referral admissions .
Naibilin metlaeng kadagiti maadmitir a pasiente ken kadwada ti panakapaisidongda iti Rapid Antigen Test (RAT) ken awan pay ti maipatungpal nga elective surgeries.
Napunn metlaeng ti COVID isolation ward ti ospital ken dagiti emergency a kaso ti maipangruna.
Mainaig iti dayta, ibalballakad met ti Kalinga Provincial Health Office ti panangliklik dagiti umili sadiay kadagiti mass gatherings, non-essential travel ken dadduma pay a klase ti panag-uurnong kagiddan ti ngumatngato a kaso ti COVID-19.
Iti kaudian a datus, dumanon iti 712 ti aktibo a kaso ti Kalinga manipod iti 293 nga aktibo a kaso dagitoy idi laeng Enero 13.
Kampanten met ti PHO a kabaelan pay dagiti healthcare facilities ti probinsia nga imanihar dagiti agdama a kaso dagitoy.
