Kinontra ti kampo ni Senador Jinggoy Estrada ti plano ti prosecution nga ikkatenda ni sigud a Department of Public Works and Highways (DPWH) Secretary Manuel Bonoan iti kaso a graft mainaig iti naanomalyaan a flood control projects.
Nangipila ti kampo ni Estrada iti counter-motion, sumagmamano nga aldaw sakbay ti mosion ti Office of the Ombudsman a mangikkat kenni Bonoan iti kaso ken pannakaamendar ti kaso.
Immuna a kinuestionaran ni Presiding Justice Geraldine Econg ti legalidad ti pannakailaksid ni Bonoan kalpasan a nakasoan.
Sigun met iti prosekusion, ti pannakailaksid ni Bonoan ket nakaland iti Rule 110, Section 14 ti Rules of Court, a mangipalubos kadagiti akusado a mailaksid iti criminal information babaen ti formal amendment.
Nupay kasta, impetteng ni Atty. Laurence Arroyo, abogado ni Estrada, a ti naisingasing a pannakabalbaliw ket mangbalbaliw iti teorya ti prosecution iti nasao a kaso.
Malaksid iti dayta, nakalanad iti orihinal nga impormasyon a nagkukumplot da Estrada ken Bonoan a nangaramid ti nadakamat a krimen.
Nupay kasta, impetteng ti prosekusion a ti pannakailaksid ni Bonoan kas akusado ket saan a makaapektar iti kaso kontra kenni Estrada.
Malaksid iti dayta, karaman latta ni Bonoan iti isyu ti flood control projects, maatap a budget insertions ken kickback commitments.
Kabayatanna, kinumpir ni Presiding Justice Econg a naisubmitir para iti resolution ti proposal for amendment ti nasao nga impormasyon.
