Nakasagana ti kampo ni sigud a Negros Oriental representative Arnolfo “Arnie” Teves Jr. a mangsango kadagiti kaso a naipila kontra kenkuana apaman a mapasubli daytoy iti Pilipinas.
Daytoy ket sigun iti legal counsel ni Teves Jr. a ni Ferdinand Topacio.
Ni Teves Jr. ket masangsango iti kaso a murder gapu iti maatap a pammapatayna kenni sigud a Negros Oriental governor Roel Degamo ken dadduma pay nga indibidual idi Marso iti napalabas a tawen.
Maipalagip a naarestar ni Teves Jr. idi napalabas a lawas idiay Dili, Timor-Leste bayat nga agay-ayam daytoy ti golf.
Kabayatanna, kinuna ni Topacio a nailaylayon iti sangapulo ket lima nga aldaw ti panagnaed ni Teves Jr. idiay Timor-Leste bayat a maberberipikar ti kiddaw ti Pilipinas ken ti International Criminal Police Organization (Interpol) para iti kustodiya daytoy.
