![](http://img.bomboradyo.com/baguio/2019/04/credit-to-Benguet-Provincial-Veterinary-Office-1.jpg)
BAGUIO CITY – Agkasapulan ti Provincial Veterinary Office ti Benguet iti kanayunan a suplay ti bakuna kontra rabis tapnu maragpatda umno a bilang dagiti aso a nasken a mabakunaan iti intero a probinsia.
Iti panakiyuman ti Bombo Radyo kenni Provincial Veterinarian Dr. Miriam Tiongan, kinunana nga umaw-awatda ti donasyon kadagiti dadduma nga ahensia wenno grupo tapnu makaur-orda iti umdas a bakuna.
Inaklonna nga agkurkurang ti suplayda iti bakuna gapu iti naapektaran a pondo ti probinsia.
Innayonna nga iti pakabuklan ket agarup 1,600 a vials ti anti-rabies vaccine ti naurnongda manipud iti Livestock Section ti Department of Agriculture-Cordillera, iti maysa a pribado a veterinarian ken iti mismo a pondo ti opisinada.
Dinakamat pay ni Tiongan nga ur-urayenda metlaeng ti kanayunan a pondoda para iti panaggatangda iti kanayunan a suplay ti nasao a bakuna.
Kabayatanna, naamuan a dumanon laeng iti 33, 000 nga aso ti nabakunaan ti opisinada idi napalabas a tawen.
Sigun kenni Provincial Veterinarian Dr. Mirriam Tiongan, nasurok paylaeng iti 20,000 nga aso ti kasapulanda a bakunaan tapnu maragpatda ti puntiryada a bilang dagiti aso iti probinsia a nasken a mabakunaan dagitoy.
Kinunana a puntiryada a mabakunaan ti nasurok 55, 000 a bilang dagiti aso iti entero a Benguet iti uneg ti uppat a bulan nga Anti-Rabies Vaccination Program ti gobyerno.
Naamuan a nasurok laeng iti 10,600 nga aso ti nakabukaanda kagiddan ti makabulan a panakarambak ti Rabies Awareness Month idi napalabas a bulan.
Kinuna ni Dr. Tiongan a katukad daytoy ti 19 percent manipod iti nasurok 79,200 a populasyon ti aso ditoy probinsia ti Benguet.
Nupay kasta, kinunana nga adda pay ti tallo a bulan dagitoy agingga inton Hunyo tapnu mangipatungpal iti massive anti-rabies vaccination kadagiti aso iti probinsia.