BAGUIO CITY -Ad-adda a mapalawa ti vaccination program ti provincial government ti Benguet babaen iti panakabigbig ken panakailukat ti ad-adu pay a provincial vaccination sites iti nagduduma a munisipyo.
Malaksid iti daytoy, plano ti Provincial Vaccination Team nga idadauluan ni Dr. Meliarazon Dulay a danunen dagiti babbarangay iti probinsia ken rugianda daytoy sadiay La Trinidad.
Panggep dagiti nasao a plano nga ad-adda a mapapartak ken mapalawa ti vaccination program ti gobyerno ken maragpat ti puntirya a panakabakuna kontra iti COVID-19 ti agarup 12,000 a residente ti probinsia iti innaldaw tapnu magun-od ti herd immunity iti panaggibus ti agdama a tawen.
Maibasar iti datus, ti Benguet ti maikadua iti rehion Cordillera a nakabakuna iti adu nga umili daytoy kasaruno ti Baguio City.
Manamnama met nga ad-adu pay nga umili ti probinsia ti mabakunaan kontra iti COVID-19 kalpasan a naipalubos ti panag-walk-in dagiti interesado nga agpabakuna.
Maibasar pay iti rekord, nasuroken iti 21,300 ti pakabuklan a kaso ti COVID-19 sadiay Benguet nga addaan ti nasurok 18,800 a panagimbag; nasurok 1,800 nga aktibo a kaso ken dumanon ti 700 nga ipupusay.
