Agtultuloy ti panangitandudo ti hepe ti Baguio City Persons with Disability Affairs Office (PDAO) ti panagbalbaliw iti “perspective” wenno kapanunutan kadagiti persons with disabilities.
Kabayatan ti workshop para iti pannakaaramid ti regional plan para kadagiti PWD, imbinglay ni Dr. Samuel Aquino, nga iti napalabas ket masansan a matmatan dagiti PWD kas recipients iti social services nga agturong iti marginalization.
Intampok ni Aquino ti kinapateg ti pannakaawat, panagdenggeg, panagkumit, ken panangkita ti lubong manipud iti “perspective” dagiti Persons with Disabilities.
Indagadagna kadagiti padana a Persons With Disabilities nga ilintegda ti “misinformation” ken mangipaayda iti umno nga impormasion maipapan kadagiti kapadasanda.
Tinalantan pay ni Aquino ti saan a patas a panangsuporta ti gobierno kadagiti PWD iti Pilipinas no idilig kadagiti dadduma a pagilian a dagiti PWD ket umawat iti siento porsiento a suporta ti gobierno. Sigun kenkuana, mapagdedebatean paylaeng ti duapulo a porsiento nga alokasion.
Iti baet dayta, inyebkas ni Dr.Aquino ti panagyamanna iti kolaborasion ti nagduduma nga ahensia ti gobierno, partikular ti Department of Social Welfare and Development (DSWD), iti panangsuporta kadagiti Persons With Disabilities.
Bigbigenna met ti commitment ti pagilian iti United Nations Convention on the Rights of Persons with Disabilities, a mangitantandudo ken mangsalaknib iti karbengan ken dignidad ti Persons With Disabilities.
