BALITANG ESPESYAL – Nairekord ti maysa a lalaki idiay India ti baro a world rekord kalpasan a nabaelanna nga ag-type iti keyboard usar ti agongna.
Sigun iti Guinness World Record, ni Vinod Kumar Chaudhary, 44-anyos, ti agtaltalinaed a record holder ti titulo kas “Fastest Time to Type the Alphabet with the Nose.”
Nakapagtype ni Vinod iti 26 nga alphabet iti uneg laeng ti 26.73 a segundo usar ti agungna.
Immunan a naala ni Vinod ti nasao a world record title idi 2023 kalpasan a nairekordna ti 27.8 seconds.
Malaksid iti daytoy, iggem metlaeng ni Vinod ti world record title a “Fastest Time to Type the Alphabet Backward (single hand)” iti uneg ti nasurok lima a segundo ken ti “Fastest Time to Type the Alphabet with Hands Behind the Back” iti uneg ti nasurok innem a segundo.
Ni Vinod ket agtrabtrabaho kas computer operator iti Jawaharlal Nehru University School of Environmental Sciences isut gapuna a naruam isuna iti napartak a panagtype iti keyboard.
