BAGUIO CITY – Impeksa ti kapitan ti Irisan Barangay ditoy siudad ti Baguio ti panakadismayana kadagiti umili sadiay nga agingga ita ket aglablabsing kadagiti nagduduma a linteg, pakairamanan ti pagalagadan kontra iti COVID-19.
Kasaruno daytoy ti panakatiliw ti uppat nga indibidual gapu iti iligal a panagsugal dagitoy iti maysa a pagtagilakuan sadiay Purok 3, Irisan ken iti panakakumpiskar ti nasurok P1,400 a taya ken baraha dagitoy.
Iti interview ti Bombo Radyo Baguio, kinuna ni Punong Barangay Arthur Carlos a mapaspasaran ti pandemya ken nepnep a nagresulta iti panagrigat ti adu a tattao ngem adda latta dagiti tattao a masulsulisog iti bisyo ti sugal.
Kinunana a nainget met ti kampanyada kontra iti sugal nangruna ta maysa daytoy a maka-apektar iti biag ti maysa a pamilya.
Gapu iti daytoy, pinagyamananna ti dagus a panag-aksion dagiti pulis ken iti maseknan nga umili a nangireport iti nasao a panagsugal.
Innayonna a sungbatan dagiti nasao nga indibidual ti kaso dagitoy.
Inyunay-unay pay ni Kapitan Carlos a kasapulan latta a masurot ti pagaladagan iti saan a panagu-urnong tapnu matungpal ti social distancing nangruna ta agingga ita ket adu latta dagiti agpospositibo iti COVID-19 sadiay.
