BAGUIO CITY–Kinarit ni Presidente Rodrigo Duterte kas Commander in Chief ti Armed Forces of the Philippines dagiti nagturpos a kadete ti PMA Alab Tala Class of 2018 nga aramidenda laeng dagiti umno ken maiparbeng a responsibilidadda iti pagillian.
Iti panagbitla ti presidente iti PMA graduation rites itay agsapa, naminsan manen nga impettengna a nakasagana daytoy a mangikalintegan kadagiti amin a uniformed personnel la ketdi awan ti labsingen dagitoy a linteg ken iti konstitusyon ti pagillian.
Kinunana a nakasagana ti administrasion daytoy a mangipaay iti kaskenan a suporta ken benepisyo para kadagiti soldado kagiddan iti maisaysayangkat nga AFP Modernization program.
Mangnamnama met daytoy nga agserbi dagiti baro a kameng ti armada puersa kas inspirasyon iti kakadwada a suldado ken ipangpangruna dagitoy ti kinatured, integridad ken kinapudda nga agserbi iti pagillian.
Innayonna a nasken met nga ipakitada a dagitoy ti namnama ti pagillian para iti matartarigagayan a panagbalbaliw iti intero a pagillian.
