Addan iti natalged a kasasaad dagiti Overseas Filipino Workers kalpasan ti panangipatulod ti Iran kadagiti missiles sadiay.
Iti pannakiuman ti Bombo Radyo kenni Genevive Batalao- Bombo International News Correspent manipud Tel-Aviv, Israel, saanda a narikna ti panag-atake ti Iran, nupay kasta adda latta ti buteng dagitoy apaman a nadengngegda ti damag.
Sigun kenkuana awan met ti nadangran nga Overseas Filipino sadiay nupay kasta adda ti maysa a 7-anyos nga ubbing ti nakaro a nadangran iti daytoy.
Kinunana nga agarup sangagasut ti impatulod ti Iran a missiles ken explosive drones sadiay kas mapapati a pammales iti inaramid ti Israel kadagitoy.
Gapu iti daytoy, dagus met a nagpakdaar dagiti otoridad sadiay iti publiko.
Innayon pay ni Genevive, nga awan ti pagdanagan dagiti kakabagyan ken pamilya daytoy agsipud ta adda met ti bomb shelter a paglemmengan dagitoy ken natalged ti kasasaadda iti agdama.
Kabayatanna, impeksana pay a saan latta met nga agsardeng ti Philippine Embassy sadiay a mangpalagip kadakuada apaman nga adda ti kastoy a pasamak.
Maipalagip a nangiyuswat wenno nangipatulod ti Iran kadagiti explosive drones ken fired missiles idiay Israel idi Sabado, Abril a trese.//Bombo Rosemarie Bulsao
