Nainget itan nga imonmonitor ti World Health Organization (WHO) dagiti pasaeros ti maysa flight a nagtaod iti isla ti Saint Helena paturong Johannesburg.
Maysa gamin kadagiti pasaeros, pimmusay gapu iti hantavirus.
Sigun iti South African airline nga Airlink, pakabulkan nga 82 a pasahero ken innem a crew ti nilaon ti nasao a flight iti Abril 25.
Maysa kadagitoy ti maysa a babae Dutch, asawa ti maysa a pimmusay gapu iti nasao a virus.
Sigun iti World Health Organization, kinmapsot ti babae kabayatan ti byahe daytoy paturong Johannesburg.
Immunan a bimmaba ti babae manipud iti barko idiay Saint Helena idi Abril 24 kalpasan a makarikna daytoy ti simtomas ti gastointestinal.
Apaman a nakadaon daytoy iti ospital idiay Johannesburg, pimmusay daytoy ken nagpositibo ti hantavirus.
Kabayatanna, binilin dagiti otoridad ti Suoth Africa ti nasao nga airline nga abisuan daytoy dagiti pasahero tapno dagos a makikoordinar iti health department dagitoy.
Patien ti World Health Organization a posible a naiwaras ti nasao a virus iti cruise ship nga iti agdama ket naka-angkla asideg idiay Cape Verde.
Malaksid iti agasawa a Dutch, maysa metlaeng a German passenger ti naireport a pimmusay.
Iti agdama, dumanonen iti 7 ti nakumpirmar ken maatap a kaso ti hantavirus. //bombokaren.c.s
