Kinumpirmar ti Democratic Republic of Congo a dumanon itan iti 204 ti bilang dagiti pimmusay gapu iti Ebola Virus.
Nailista daytoy kadagiti tallo a probinsiya iti central African country.
Maipalagip nga immuna a kinuna ti World Health Organization (WHO) a dumanon iti 177 ti pimmusay manipud kadagiti 750 a suspected cases.
Iti agdama, agtultuloy ti panagwaras ti nasao a sakit sadiay pagilian a Congo.
Kabayatanna, nagballaag ti health agency ti African Union a posible nga ad-adu a pagilian iti kontinente ti agpegpeggad a maapektaran iti Ebola, malaksid iti Congo ken Uganda.
Sigun kenni Jean Kaseya, mangidadaulo ti Africa Centres for Disease Control and Prevention (Africa CDC), posible a makaran dagiti sangapulo a pagilian a pakairamanan ti Angola, Burundi, Central African Republic, Republic of Congo, Ethiopia, Kenya, Rwanda, South Sudan, Tanzania ken Zambia.
