Maisingsinagsing a nasaysayaat nu iti panaglabsing iti national law ti pakaipilaan ti kaso kontra kadagiti indibidwal a nararanggas iti dingwen gapu ta nadagdagsen ti pannusa a maipaay kadakuada.
Iti panakiuman ti Bombo Radyo kenni Atty.Betty Lourdes Tabanda,Councilor ti Baguio City, nalimitaran laeng iti agingga lima ribo a piso(Php5,000) ti multa ken agingga maysa a laeng a tawen a panakaibalud ti mabalin a pannusa kadagiti mangdangran wenno mangpapatay kadagiti dingwen nu ibasar iti agdama nga ordinansa ti lokal a gobyerno ti Baguio City.
Sigun kenni Atty. Tabanda, sumagmamano laengin dagiti maob-obserbaranda iti siudad ti Baguio nga agpatpatay partikular kadagiti aso ngem agtultuloy latta ti panakaipaganetget ti ordinansa ken pagalagadan a mangprotprotektar kadagiti dingwen.
Kagiddan dayta, inlawlawagna a mailaskid iti nasao nga ordinansa dagiti agparti ken agpulutan ti aso laketdi, daytoy ket para iti religious purposes wenno cultural purposes kas iti panakaipatungpal ti ritwal.
Imbinsa-binsa ti opisyal a dagiti laeng mabalin a maparti nga ayop sigun iti national law ket pakairamanan ti baka, baboy, kalding, poultry, rabbit, nuang ken kabalyo.
Ti panagparti kadagiti taraken nga aso ken pusa ket maysa a panaglabsing iti The Animal Welfare Act of 1998 ti pagilian a Pilipinas.//Bombo Rob Dominguez
