Impatangken ni Senador Risa Hontiveros a rumbeng a maituloy ti “trial” ni Vice President Sara Duterte iti impeachment court ken saan a bigbigen ti motion to dismiss wenno convict.
Daytoy ket reaksion ni Hontivers iti kinuna ni Senate President Francis “Chiz” Escudero idi napalabas a lawas nga amin a senator-judges ket mabalin a mangidatag ti aniaman a mosion.
Sigun kenni Hontiveros, kasapulan a makita ken manggegna ti tunggal witness iti tunggal article ken kayatna a masurot ti umno a proseso.
Dinakamatna pay a ti tignay a mangikkat wenno mangkonbiktor a direkta ket saan a patas iti prosecution.
Namnamaenna nga ag-convene ti korte inton Hulio baente nuebe ken maikonsiderar ti sungbat ni Duterte iti summons ken ti sungbat ti House Prosecution Panel kenkuana.
Maipalagip nga insubmitir ni Duterte iti impeachment court ti sungbatna idi Hunio 23, 2025, bayat nga isubmitir ti panel ti sungbatda idi Hunio 27, 2025.
