Ad-adda a ngimato iti 38% ti kaso ti dengue iti Munisipyo ti Itogon maibasar iti monitoring ti nasao a munisipyo manipud Hulyo 19 agingga Hulyo 25 ti agdama a tawen.
Gapu dayta, irekrekomendar ti Itogon Municipal Health Service Office iti publiko ti dagos a panagkonsulta apaman a makarikna dagitoy iti anyaman a simtomas.
Kagidan dayta, umap-apila met daytoy iti publiko a saanda nga agpakampante iti self-medication laeng ken irekrekomendar ti pannakaregulate iti panaggatang iti agas kadagiti pagatangan “stores”.
Inlawlawag ni ROSAN BALISTO NURSE III ti Municipal Health Services Office a saan a maiparit ti self-medication ken pananggatang ti agas kadagiti pagatangan ngem nasaysayaat nga agpakonsultada iti doktor wenno kadagiti health professionals wenno agturung iti pharmacy wenno ospital para iti umno nga agas ken dosage a matumar.
Kabayatanna, sigun kenni Claudine Cariño, Health Program Officer II ti Itogon Municipal Health Services Office a maibasar iti datos dagitoy iti Hulyo 19 agingga Hulyo 25, dumanon iti 467 ti nailistada a kaso ti dengue manipud iti bilang a 421 manipud Enero 4, 2025 agingga Hulyo 18 iti agdama a tawen.
Manipud iti bilang a 467 a kaso, 205 kadagitoy ti babbai ken 262 met dagiti lallaki.
Rumrumwar metlaeng iti datosda a kadawyan a nainfect iti sakit a dengue ket dagiti agtawen iti 26-40.
Kabayatanna, ti Barangay Tinongdan ti nakailista ti kaaduan a kaso ti dengue iti bilang a 120, sarunoen ti Barangay Virac iti bilang nga 82; 67 manipud Dalupirip, 54 idiay Barangay Tuding, 47 idiay Barangay Ampucao, 45 idiay Barangay Poblacion, 35 idiay Barangay Loacan, 14 idiay Barangay Ucab, ken tallo idiay Barangay Gumatdang.
Inlawlawag met da Cariño kenni Balisto nga adu dagiti factors nu apay a nangato ti kaso ti dengue iti nasao a munisipyo. Karamanen ditoy ti agtultuloy ken epektibo nga IECs ken panagpachek-up dagiti residente sadiay.
Posible metlaeng a daytoy ket gapu iti napartak ken gaget a panangmonitor ken panangverify dagiti maseknan nga ahensya kadagiti residente tapno biruken ken kitaen dagiti addaan simtomas ti dengue wenno anyaman a sakit
Malaksid iti dayta, posible a maysa a factor ti kina-accessible dagiti district healh centers ken libre a panagpacheck-up ken panangpaagas gapu iti Medical Assitance to indigent amd Financially Incapacitated Patients (MAIFIP) program.
Iti sabali a bangir, agtultuloy ti panangipatungpalda iti simultaneous larval surveillance iti nasao a munisipyo.
Agpalpallagip met dagitoy iti publiko a makitinnulongda kuma iti panangsalwad iti salun-at kas iti panangipatungpal iti 4S ken 4Ts tapno maliklikan ti pannakapukaw ti biyag ken maliklikan ti pannagsakit ti dengue.
Maipalagip a ti Munisipyo ti Itogon ti nakailista iti umuna a dengue-related death.
Nupay inlawlawag dagitoy a nagapu idiay La Union ti biktima no sadino ada metlaeng dagiti record ti dengue, saan a masinunuo nu sadinno ti nakaalan ti lalake ti sakit gapu ta awan ti travel history daytoy iti dadduma a lugar iti las-od ti nasuruk makabulan a panag-naedna iti munisipyo ti Itogon. // via Bombo Noveh Organo
