Bimmaba ti kaso ti dengue iti probinsya ti Benguet kas maibasar iti kaudian a datos ti Provincial Epidemiology and Surveillance Unit.
Nu pay kasta, agpalpalagip dagiti otoridad a nasken nga agbalin a naridam ladta ti publiko.
Maibasar iti datos ti Provincial Epidemiology and Surveillance Unit, nailista ti 480 a baro a kaso ti dengue manipud Setyembre a uno agingga a syete iti agdama a tawen rason a dumanonen iti 7,016 ti pakabuklan a kaso iti probinsya ti Benguet manipud Enero agingga Setyembre.
Ti munisipyo ti La Trinidad ket nakailista iti kangatoan a kaso a dumanon iti 2,065 ken sarunoen ti Itogon nga addaan iti 867 a kaso.
Ti munisipyo ti Kibungan met ti nakailista iti kabasitan a kaso a dumanon iti sangagasut.
Kabayatanna, dumanon iti sangapulo nga indibidual ti pimmusay gapu iti dengue, lima kadagitoy ket manipud La Trinidad, sag-dua ket manipud Bokod ken Tuba ken maysa sadiay Tublay.
Maipalpalagip met iti publiko ti kinapateg ti panangmintinir iti nadalus nga aglawlaw tapno maliklikan ti nasao a sakit.
