Impakaammo ti City Health Services Office-Baguio nga agtaltalinaed paylaeng a nababa ti kaso ti dengue iti siudad.
Iti panakiuman ti Bombo Radyo kenni Dr. Celia Flor Brillantes, City Health Office ti City Health Services Office, kinunana a sipud iti bulan ti Mayo ken Hunyo ket nababa ti kaso ti dengue.
Sigun kenkuana, bimmaba daytoy gapu iti nagduduma a programa dagitoy tapno malapdan ti panagadu ti kaso ti nasao a sakit iti syudad.
Kinunana a nakatulong ti panagmonitor ken inspeksyon dagiti umili iti tunggal barangay kadagiti masakupanda nangruna dagiti possible a pagitlogan dagiti lamok.
Impetteng ti nasao nga opisyal nga napalpalabas ket arigna a saan a madmadlaw dagitoy dagiti umili rason nga adu ti nailista a kaso ti nasao a sakit.
Mainaig iti dayta, impeksana nga awan ti parikut kadagiti indibidual nga agur-urnong iti danum kadagiti drum la ketdi nakaleban dagitoy a nasayaat tapno saan a makastrek dagiti lamok nga agitlog.
Maiyunay-unay pay a rumbeng a saan a baybay-an a nakalukat dagitoy iti nabayag tapno maliklikan dagiti pagitlogan dagiti lamok.//Bombo Noveh Organo
