Dumanonen iti dua pulo ket lima a kaso ti firework related injuries ti nailista iti rehiyon Cordillera manipud Disyembre baente uno idi napalabas a tawen agingga ita nga aldaw.
Iti panakiuman ti Bombo Radyo kenni Geeny Anne Austria-Nurse V ti Public Information Officer ti Department of Health-Cordillera, kinunana a ti Abra ti nakailista iti kaadoan a kaso a dumanon iti walo; sarunoen ti siudad ti Baguio a dumanon iti lima; probinsya ti Apayao, Benguet ken Kalinga a sag-tallo a kaso; probinsya ti Mt. Province a dua a kaso ken ti Ifugao a maysa a kaso.
Sigun kenni Austria, agtawen iti uppat ti kaubingan a naputukan bayat a ti kataengan ket agtawen iti lima pulo ket uppat.
Innayonna pay a kaadoan kadagiti biktima ket lallaki.
Maysa met ti naberipikar a naipasidong iti amputation bayat a dumanon iti sangapulo ket innem nga indibidual ti nakapasar iti blast burn, pito ti nagsagrap iti eye injury ken maysa ti nagsagrap iti multiple injuries.
Innayon pay ni Austria a ti panagaramat iti iligal a palibang a kas iti boga ti kangrunaan a rason para iti firework related injuries.
Kabayatanna, nagpalagip daytoy a nasken ti panagturong a dagus iti ospital nu naputukan ken liklikan ti self medication gapu ta mabalin nga agka-impeksyon daytoy.
Malaksid iti dayta, liklikan met laeng ti panagpidot kadagiti saan a bemtak a paputok.
Maiyunay-unay met nga iti panagdalos kadagiti paputok ket nasken a buyatan iti danum dagitoy tapno masigurado a san pay a pumtok.
