BAGUIO CITY – Bimmaba ti kaso ti sakit nga HIV-AIDS ditoy Baguio City bayat ti agdama a COVID-19 pandemic.
Sigun kenni Baguio AIDS Watch Council (AWAC) head ken Assistant City Health Officer Dr. Celia Flor Brillantes, manmano laeng dagiti rimwar a nagpasidong iti HIV testing bayat ti pandemya isut gapu a saanda a nakaala iti umno a datos.
Nupay kasta, kinunana a kaaduan kadagiti HIV patients ditoy siudad ket manarimaan ti panagpatamingda.
Dinakamatna a dumanon iti 65 manipod iti 88 a pasyente ti nasao a sakit iti agpatpataming ita iti pagagasan.
Impanamnamana met a nainget ti panangwanwanawanda tapnu maliklikan ti ad-adda a panagwaras ti nasao a HIV-AIDS.
Innayonna pay a kaaduan kadagiti pasyente ti HIV-AIDS ita ket addaan ti nababa a viral load ken undetected dagiti virus kadagitoy.
Malaksid iti daytoy, kidkiddawen ni Dr. Brillantes ti panangsuporta ti lokal a konseho iti panakagatang ti CD4 count testing machine.
Maaramat ti machine iti panakabilang ti CD4 ti maysa a pasyente ti HIV tapnu mabigbig ti kasasaad ti immune system daytoy.
Ti CD4 ket maysa a kita ti white blood cells a tumultulong iti pananglaban ti bagi iti impeksion ken iti kaso ti maysa a pasyente ti HIV ket ti
Impasigurado pay ni Dr. Brillantes ti kinasaganada a makitinnulong iti maseknan a komiti iti lokal a konseho para iti panakabukel ken implementasyon ti lokal a bersion ti Philippine HIV and AIDS Policy Act.
