BAGUIO CITY – Dumanonen iti 15 ti kaso ti Omicron variant ti COVID-19 iti entero a rehion Cordillera kas maibasar iti kaudian a rekord ti Department of Health-Cordillera.
Sigun kenni DOH-Cordillera Assistant Regional Director ken spokesperson Dr. Amelita Pangilinan, naduktalan dagiti nasao a kaso babaen iti Whole Genome Sequencing kadagiti specimen a naisumitir sadiay Philippine Genome Center para iti nasao a proseso.
Kinunana a manipud iti 15 a kaso ket 13 dagiti baro a kaso ti Omicron variant.
Maibasar iti rekord, ti age range dagiti nakaptan ti Omicron varian ket 1-64 years old bayat a kaaduan wenno 10 kadagitoy ti nakitaan ti sintomas ken kaaduan metlaeng wenno 10 kadagitoy ti babbai.
Naamuan metlaeng a kaaduan kadagitoy ti awanan ti travel history iti ruar ti Cordillera, dimmar-ay iti bassit a family gathering ken dagitoy ket contacts dagiti close contacts dagiti Returning Overseas Filipinos.
Dumanon iti 9 a kaso ti Omicron variant ti nailista ti Baguio City, no sadino, 7 ditoy ti baro a kaso bayat a sag-2 a kapada a kaso ti nailista iti Benguet, Ifugao ken Mountain Province.
Innayon pay ni Dr. Pangilinan a nabagaan metten dagiti provincial LGUs iti panangisayangkatda ti back tracing dagiti contacts dagiti nasao a kaso ti Omicron variant.
Imbingpayna metlaeng nga iti kaudian a rekord-da ket dumanonen iti nasurok 4,000 nga specimen ti impasukimatda iti Philippine Genome Center ken 969 kadagitoy ti addaanen ti resulta.
Sigun kenkuana, 279 dagiti Alpha variant, 85 dagiti Beta variant, 585 dagiti Delta variant, 15 dagiti Omicron variant ken 5 ti variants under monitoring.
