Bumabbaba ti kaso ti panagrames iti siyudad ti Baguio, sigun iti Baguio City Police Office.
Maibasar iti datus ti nasao nga opisina, tallo laeng a kaso ti panagrames ti nairekordda manipud Enero uno agingga Marso ita a tawen nu idilig iti sangapulo nga insidente a nairekordda idi napan a tawen iti kapada a bulan.
Dua kadagiti tallo a biktima ket addaan ti legal nga edad bayat a ti maysa ket menor de edad.
Kaadoan a kaso ket napasamak iti residential areas ken kaadoan kadagiti suspect ket agtrabtrabaho agingga iti rabii.
Ti panagbaba ti kaso ti panagrames iti siyudad ket gapu iti nagtipon a kampanya ti Baguio City Police Office, City Social Welfare and Development Office ken ti City Health Services.
Idi 2019, nangato ti kaso ti panagrames iti siyudad ti Baguio gapu ta nairekord ti innem a pulo ket walo.
Bimmaba daytoy idi 2020 iti uppat a pulo ket lima, ngimmato manen idi 2021 iti innem a pulo ket uppat; bimmaba idi 2022 iti uppat a pulo ket uppat ken ad-adda pay a bimmaba daytoy idi napalabas a tawen iti dua pulo a kaso.
Naalarma ni Mayor Benjamin Magalong isut gapuna a nangipaay daytoy ti direktiba kadagiti maseknan nga ahensiya a dagus nga agaramidda ti programa tapno malapdan ti kaso ti panagrames.
Karaman kadagiti naipatungpal a programa ti information, education campaign materials kontra panagabuso kadagiti ubbing ken panagrames.
